248-957-1841 info@westarabia.com

دائما بمخيلتي في عرب قاعدين مقابيل شاشات التلفزيون والكومبيوتر وناطرين أي حدث يصير.. تفجير,قتل,سرقة,أي شي ممكن العرب يُتهموا  فيه .. حتى هالاشخاص فورا يلبسو قناع البريئ ويطلعو عالشارع الغربي ويستجدو عطف الناس على هالحدث ..

تفجير بفرنسا !! يلا قومو نطلع نحمل لافتات انو التفجير لا يمثلنا .. ونمشي بالشارع ..

ولسا بيكون احسن ازا منوزع ورد وابتسامات عالرايح والجاية .. للكل .. هيك اكيد رح يحبونا ويقولو لك ليك والله طلعو العرب كويسين…

وبدي غير صورة بروفايلي ليعرفو انا اديش كويس وبريئ وماني متل هدول العرب المجرمين..

اغتصاب بكولن ؟؟ يلااا نطلع نساوي نفسي الشي .. وبركي بالمعيّة كمان منعمل متل هاد الشب اللي حط جنبو لافتة مكتوب عليها انا مسلم والعالم يعتقد أني ارهاب و صار ياخد احضان من الناس بالشارع ..

ليش نحنا منحب دائما نعتذر عن اخطاء ما ارتكبناها ؟!

ولا حتى مؤيدين الها !!

ليش لحتى نطلع ونمثل دور البريئ عند كل جريمة شي عربي بيعملها ؟! انت عملتها شي؟ انت فجرت؟ انت اغتصبت؟ طيب انت برأيك هاللّي فجر واغتصب انسان طبيعي وبمخ وباخلاق او لا ؟ طالما جوابك هو لا،ليش عم تعتذر لكن انت؟

بتعرفون لهدول يلي بيكونو حكام ببرنامج للمواهب بيقومو اول ما يصحلّون فرصة يحكو كلمتين عالمايكروفون بيصرعو الجمهور بآرائون عن كلشي تفجيرات وجرائم معاصرة ورأيون بالانتخابات وامتعاضون عن انو ليش فلسطين لسا ما تحررت وتعاطفون مع كل اللي عم يموتو من الجوع بافريقا !! طيب بس هاد برنامج للمواهب .. والمذيعة عطتك المايكرفون لتقول رأيك بالمشترك المنقوع وناطر تخلص كلامك عن كلشي في قضايا انسانية بالعالم !!

ما حدا ينكر انو كلنا منكرهو لهالشخص ..وكلنا منتأفأف منو ..

بطريقة غير مباشرة نحنا عم نعمل متلو تماما .. لو هالحكم عطا رأيو بالمشترك وبس ,هيك هو ما بيكون انسان مؤيد للجرائم السابقة ابدا ..ولا بيكون انسان خالي من الرحمة والضمير ..  هو بس بيكون انسان عم يشتغل شغلو بأتم وجه …

المشكلة انو كترة اعتذاراتنا على اخطاء ما عملناها خلت الكل يستوطي حيطنا .. وينتظر مننا اعتذار عند كل خطأ عربي بيصير. واذا ما اعتذرنا فورا الغرب كلو بيصير يزاورنا من بعيد .. لانو هيك تعودوا .. “جريمة عربية ⬅️ اعتذار عربي “

كل عمرون الغرب عندون جرائم.. طيب ليش ما بيطلعو متلنا وبيوزعوا ورد عالعرب وبيعتذروا ؟ ليش ما بيطالبوا باحضان بالبلدان العربية مع لافتات مكتوب عليها انا غربي والعالم يعتقد أني ارهابي وحرامي ومغتصب وكل هالبلاوي الزرقة يلي موجودة عندون كل عمرها متل مو موجودة بأي مجتمع بالعالم !!

هدول الكلمات والاعتذارات اللي بتقولون لمين ما كان ,بأي وقت كان  , انسألت عن رأيك او ما انسألت.. هنن يلي عم يصنعو عادة وانطباع بعقول أي حضارة عم تتفرج عليك  .. اختار كلماتك عطول .. وخلي اخلاقك وتصرفاتك ,طموحك واهدافك تحكي عنك ..ما تكون متل اللي بيتصل بالراديو حتى يجاوب على سؤال بمسابقة وبيصرع الدنيا تحيات .. لامو وابوه واخواتو واصدقائو فردا فردا ولجدو اللي توفى من خمس سنين وللمذيع يلي ما بيعرف حتى شو اسمو ..

خليك بروفيشنال ..هيك رح تخلي كل مين حواليك شو ما كانت جنسيتو يدافع عن كل العرب وهو بلسانو يقول مو كل العرب مجرمين بس لمجرد انو بيعرفك الك .. وبيعرف انت اديش عربي ناجح وخلوق ..

ازا كلنا عملنا هيك رح نوصل بيوم من الايام لزمن العالم كلو بيتعامل مع المجرمين كأفراد وليس أمم ..